Fel noddwr swyddogol Hanner Marathon Abertawe, mae’n bleser gennym eich gwahodd i ymuno â #Tîm Abertawe, a manteisio ar un o leoedd am ddim neu ostyngedig y Brifysgol sydd ar gael ar gyfer ras 2024.
Cynhelir y ras ddydd Sul 29 Mehefin 2024 y flwyddyn nesaf a bydd yn fwy ac yn well nag erioed wrth i ni ddathlu pen-blwydd y ras yn 10 oed.
Yn dilyn llwyddiant #tîmabertawe Prifysgol Abertawe yn 2023 a thros 100 o fyfyrwyr, staff a chyn-fyfyrwyr yn rhedeg dros Brifysgol Abertawe, codwyd dros £20,000 i gefnogi prosiectau iechyd meddwl ar draws y Brifysgol, ac rydym yn awyddus i gynnig y cyfle i gynifer ohonoch â phosib i gymryd rhan.
Os hoffech gael her newydd, am godi arian at achos da, neu rydych yn dwlu ar redeg, ymunwch â #TîmAbertawe – ‘Cymryd camau breision dros iechyd meddwl’ drwy glicio ar y ddolen a chofrestru eich manylion.
Bydd y ceisiadau’n cau ddydd Gwener 15 Rhagfyr ac ar ôl hynny bydd lleoedd yn cael eu dyrannu drwy dynnu enwau. Caiff y ceisiadau eu cyhoeddi ddydd Gwener 18 Rhagfyr gan roi cyfle i chi gynnwys pâr newydd o esgidiau rhedeg ar eich rhestr siopa ar gyfer sêls mis Ionawr!
Sut i gofrestru
Cofrestrwch eich manylion yma a bydd un o’n tîm yn cysylltu â chi ar ôl tynnu’r enwau.
Y cymorth y byddwch yn ei dderbyn
Fel rhan o #TîmAbertawe, byddwch yn derbyn y newyddion diweddaraf drwy e-bost gydag awgrymiadau ysgogol a sut i godi arian, straeon am redwyr a mynediad i ddigwyddiadau arbennig.
Y ras
Hanner Marathon Abertawe sydd wedi ennill sawl gwobr yw ras yr haf fwyaf a gorau yng Nghymru gan fwynhau golygfeydd godidog Bae Abertawe ar hyd y daith. Os ydych yn rhedwr elît neu’n rhedeg y ras am y tro cyntaf, mae’n berffaith ar gyfer unrhyw allu, felly gwnewch yn siŵr eich bod yn sicrhau eich lle i #Redegbertawe yn 2024!
Yr Ymgyrch
Ym Mhrifysgol Abertawe, rydym yn cymryd camau breision dros les gwell, ac yn credu na ddylai neb sy’n cael trafferth â’i iechyd meddwl ddioddef ar ei ben ei hun. Ymunwch â ni yn awr i gefnogi iechyd meddwl gwell i bawb, o atal hunanladdiad ar gyfer cenedlaethau’r dyfodol, gweithlu’r GIG mwy gwydn, ac atgyfeirio at ymarfer corff i fyfyrwyr sy’n teimlo dan straen. Gallwch ddarllen mwy am gefnogi gwaith pwysig y Brifysgol yn y maes hwn ar ein gwefan.
Ddim yn siŵr o hyd? Edrychwch ar y rhai a wnaeth gymryd rhan y llynedd a pham y gwnaethant benderfynu rhedeg.
Ymunwch â #TîmAbertawe